Lemon's Dairy

吃喝玩樂八月篇

2006-08-26T23:25:00.000+08:00

成個月無update過個blog，因為太懶......皆因成個八月都掛住去玩，玩完個人都超攰，重邊有精神去寫野丫。

八月頭去左考ia既體能，因為有上年既經驗，再加上今年不停咁運動，所以對自己既體能都幾有信心，結果都如願以償，無驚無險pass左，覺得其實今年係易考左，可能因為個場地關係，等九月頭再去group interview。

keep住每個禮拜日打波、去沙灘，個人越黎越健康，不過可能虛耗過度，搞到有幾日唔係咁舒服，好彩好快已經復原。要不斷操練，提升狀態，希望下個月既比賽會有好表現﹗

連續兩個星期同事們一齊去唱k，全因carol考完試無野做，一次比一次多人，非常熱鬧，最緊要係兩次都唱得幾盡慶，出黎玩最緊要玩得開心嘛，雖然玩得夜大家都攰，不過唔緊要，最緊要開心﹗

終於到左戲肉喇，月中我地一行十一人群起北上，由籌備到出發，歷時一個多月，活動當日群情洶湧，各路人馬於中午時份齊集於上水美心門外，由領隊kenny帶領出發北上尋歡。到深圳後先品嚐領隊推介、菜色得過獎既四川菜，可能我都係食慣廣東菜，所以覺得普通。飽餐之後，我地分道揚鑣，kenny、sze、tina同david去按摩，而cindy、carol、yan、hiska、阮志、jack同我就去左行街，大家約好時間集合。係炎熱既天氣下行東門，都幾辛苦，不過亦令我眼界大開，原來深圳既老翻真係有一手，我地發現左一個好多老翻既商場，無論鞋、衫以至飾物，都翻得好似，尤其係converse，簡直一樣，所以我都唔執輸，以$50買左對，超抵﹗

跟住就獻出左我第一次既揼骨經驗，去左一間我覺得唔係太乾淨既腳底按摩，開頸都ok既，不過之後按我腳板底條根好痛，唔知係咪太緊呢條根，不過佢地竟然話無事，真係......晚上我地去左羅湖附近一間叫「食為先」既廣東菜食飯，我覺得幾ok喎，不過食物都係其次，最緊要大班人一齊食得開心﹗最後由皇崗坐巴士直達荃灣，非常方便。

*有一件事較為深刻，係深圳一出地鐵站見到一對母子坐係垃圾桶前不斷摷垃圾食，唔係未諗過，不過親眼見到比較震撼﹗..................幸福唔係必然

好Q谷氣

2006-07-31T22:06:00.000+08:00

星期六本身大伙兒去海洋公園加勒比海下水禮，但因為前一日已經落雨，個個都十五十六去唔去，結果到星期六真係落狗屎，去左都無隱，所以都係取消左，我地轉戰 k場，可惜只係得三個鐘唱，阿jack重要遲黎，不過其實都夠喇，真係唱歌既人都唔多，都夠皮。

因為時間尚早，無理由白白浪費左個星期六，所以我地又轉戰去李志穎既天水圍屋企打麻雀。第一次上佢屋企，好高，成四十樓，不過正因為咁可以飽覽出面既風景，唔錯，可惜佢無咩裝修，對房門好似垃圾房門咁，超搞笑﹏因為人多，結果佢同大佬打機，我、阮志、jack同鄧錦恩打麻雀，阮志竟然食邪牌(自摩十三么)，最尾重跣左鄧錦恩一獲，認真無陰公。

打完麻雀，我地去左元朗食壽司，因為聽聞抵食夾大件，去到見到幾間都好多人，結果我地分頭等喇，我同jack &阮志係千之壽等，yan & carol係酒泉(田中隔離果間)等，結果我地有位先，門口個侍應問我地到齊未，我話未，大約二分鐘到，跟住佢無出聲，二話不說就叫左兩張二人枱入去，都算喇，我地又真係未齊人，不過再過多一陣，佢又再問我地齊人未？jack同佢講就黎到，等多一陣，佢竟然話「等左你兩分鐘喇喎」，態度囂張得佢丫，低能﹗好似全世界得佢一間野有得食日本野咁，我覺得我地未齊人係我地既問題，但係佢果d係咩態度呀﹗好似我地黎乞食咁，無野呀﹗而家食野，除左食佢d野食之外，服務都係基本考慮條件，放心喇，以後唔使旨意我去﹗以下附上有關圖片。

靄生日

2006-07-31T00:13:00.000+08:00

前晚係尖沙咀港晶中心唱k buffet，為靄補祝生日，唔知點解我地成日都係果間唱，可能係因為d野都算好食。大家幾個月唔見，都無咩大既改變丫，唯一係靄電了一頭鬈髮，我覺得唔錯喎﹗上年犯左既大錯誤，今年唔會再犯喇，所以我買左個穩陣既芒果栗子蛋糕，重有d假金薄係面添，不過中間層栗子我就認為麻麻~成晚最搞笑係阿dick同靄玩自拍既時候，竟然跌左我部相機落d蛋糕度，大家即刻呆左，跟住佢竟然同我講「抺下無事」，佢重要慢慢咁係度抺，真係笑爆咀﹗

之後唱完k都係十點幾，我地就去左搵機舖打番我地以前每日放學都去打既四人槍game，搵左好多間都無，終於行到去新港搵到，可惜得番兩支壞壞地既槍用，唯有雙打。想當年我地差d就可以打到榜上有名，而家就連過幾版都有困難，實疏於練習之過，最後我地都係打唔爆機，確實係有d心心不忿，不過大家都攰喇，唯有收隊。

報應

2006-07-26T00:18:00.000+08:00

上星期因為官恩娜擅自走去買左$900既去澳門package而無叫我去簽卡，結果我祝佢一路順風，點知真係好既唔靈醜既靈，今日佢番黎講左佢頭頭碰着黑既旅程，我既詛咒竟然應驗左﹗真係唔好意思喇官恩娜，我唔想嫁~!

不過下晝，我相信報應即時發生係我身上，李志榮收到消息可以改機既白色psp已經俾人換晒，唔係掛﹗﹗﹗

燃燒生命~

2006-07-24T23:25:00.000+08:00

連續一個星期既太陽，雖然好熱，但係我喜歡﹗一連幾日既活動，夜瞓、早起、烈日之下既劇烈運動，令到身體極疲倦，不過，好有活着既感覺，我喜歡夏天，佢讓我覺得自己既生命正在燃燒﹗即使辛苦，也要繼續......

好多謝咁多位同事既幫手，我好快有psp玩，我會帶番黎俾大家玩下既﹗

巴士駡戰

2006-07-14T23:20:00.000+08:00

琴日早上搭巴士既時候，見到兩個中年既男人鬧交，事緣都唔知係點解lu，因為一開始無留意，大致係一個帶住個幾歲大既女既男人話另外一個男人撞到佢個女同埋眼超超佢，跟住就鬧起上黎，不斷重複幾句耳熟能詳既粗口，完全沒有內容，已經成為香港人既鬧交模式，嘈吵既嗌交聲令全部下層既乘客投以不滿既目光，奈何始終沒有人去幫口，最後另外一個中年既男人出聲叫被鬧既男人坐去另一度，事件才得以告一段落。係整個過程中，我都只係繼續聽我既歌，如果佢地真係打起上黎，我諗我會去分開佢地，不過如果只係鬧交就......其實咁燥做咩丫，搭巴士上車落車少少碰撞梗有喇，好少事姐﹗

放工之後踢波，係一個極差既天氣之下踢，超辛苦，好似抖唔到氣咁~然後拖住疲憊既身軀去旺角會合jack同low b佢地唱k，好耐無見過芝姐了，聽佢訴說近況，都幾搞笑，希望佢快d搵到新工喇~

#旺角金雞廣場附近既neway city既buffet無咩食，人就多.......不過佢有winning打

淺水灣曬太陽

2006-07-09T23:51:00.000+08:00

今日約左david、terence 同埋 fiona 去沙灘玩，一起身就見到滂沱大雨，以為都係取消多喇，點知佢地今次咁認真，竟然照去，我當然奉陪到抵，可惜leo有事唔去得。

去到香港站，先係ifc食個早餐，點知竟然開始下起毛毛細雨，唯有即時轉換地點，去fiona屋企玩，好彩係等巴士既時候，我肚痛去左廁所，就係呢個時候，佢地又再改變主意，決定照原定計劃去沙灘，去度果然希望在明天，真係無落雨，之後重好好太陽添，認真開心~

可能因為早上落雨，人唔係好多，不過唔緊要，最緊要好天，希望夏天每一個星期日都好好天﹗

天國再會了~brenda~

2006-07-03T22:41:00.000+08:00

星期五晚睇完germany對argentina同italy對ukraine後，星期六又黎真正既世紀大戰，england對portugal同brazil對france，依晚豪哥、福、劉生、leo同leo哥都上晒黎我屋企睇，認真熱鬧，依個睇波陣容對上一次出現要追溯番四年前上一屆世界杯了，我地睇完一場傷心既球賽，然後轉戰往樓下既茶餐廳繼續睇波，成間茶餐廳都係人，行都有d困難，不過氣氛係超正既﹗可惜，賽果又一次令人傷心，接連既兩次打擊，心情低落，係我心目中，2006世界杯已經完結了﹗

星期日早上十一時，電話響起，jack來電，「有個唔係咁好既消息......」我即時諗起brenda(因為釣墨魚果晚收到佢入左醫院既消息)，果然........

明明幾個月前重同佢玩緊，明明好人好姐，點解會.........天氣異常地好，但心情卻悶悶不樂.......
想起在emily家玩，想起海洋公園halloween，想起迪士尼，想起睇kingkong，想起......很多很多...

希望你在另一個世界依然咁開心快樂
我的朋友 ~ brenda~

釣墨魚

2006-07-03T22:18:00.000+08:00

6月30日星期六，因為第二日係紅日，梗係要搵野搞搞佢，於是同事們發起釣墨魚加睇波直落團，一呼百應，一行十五六人，在西貢上船，到科大附既水域開始我地既釣墨魚比賽，不過唔知點解，墨魚既數目極少(唔知係因為天氣既問題定係我地技術差)，釣左成半個鐘都未有人釣到，於是船家決定轉換地方(不過其實都係附近)，見到周圍都係船，証明應該係多d既，果然好快就有人釣到，呢一隻可憐既墨魚就咁激發起大家既獸性，不斷係咁出力釣，唔知好彩定唔好彩，最終都係釣得果幾條咁多，我就連一條墨魚尾都釣唔到，極之灰心，好彩船家都預備定少量既墨魚，等我地都可以一嘗墨魚既滋味﹗

十點半到上岸，飛奔去旺角greenbox睇波，因為人多既關係，可以睇晒兩場，中間重有兩個鐘可以唱下k，其實都ok抵，依個決定係無錯既﹗

(釣墨魚時，收到個突然既消息......)

燥底

2006-06-22T20:19:00.000+08:00

隨住世界杯熾熱情緒不斷提升，我既燥熱程度也沒有減退，捱更抵夜，令到我更情緒化，希望受過我情緒影響既人，見諒見諒~

SORRY~

夏天，我來也﹗

2006-06-22T19:51:00.000+08:00

成個月既下雨天，令人情緒低落，不過，太陽終於出來了﹗隨住太陽既回歸，亦即代表夏天又來了﹗

難得重見天日，梗係要把握機會，做延遲左一個月、夏天必做既活動 - 去沙灘﹗雖然之前果晚睇波睇到2點，但都無阻我地去海灘既熱情，十點零去到筲箕灣，已經見到有好多三五成群既男女老少，帶俾晒沙灘既裝備，真係有d誓心會唔會插針都插唔入，等候埋flora同joanna，我地先行一步去大浪灣，原來大浪灣d水都幾淺，出到海五十米都重可以踩到地下，難怪佢無浮台。terence同leo一去度就即刻除衫搽太陽油曬太陽，重曬到瞓着左，認真舒服~我唯有同佢地吹下水先。之後low b 同佢d朋友陸續抵達，佢地一黎到就顧住滑浪，我地唯有自己游下水、曬下太陽，其實都幾good﹗當我曬太陽既時候，被人偷襲，但發覺時已經太遲.............

沙灘，你等我，我會再黎嫁﹗

世界杯萬歲﹗

2006-06-18T23:22:00.000+08:00

期待已久既世界杯終於開鑼，唔經唔覺已經打左28場賽事，雖然唔係場場睇，不過都睇左大部份，每日都係瞓得2 -3 個鐘，搞到鬼咁熱氣，滿口「飛滋」。不過都係值得既，因為真係太刺激喇，熾熱既氣氛，令人抖不過氣，遇到重頭戲就梗係約埋d friend一齊睇嗌餐飽喇，多d人睇氣氛都好d喇，各位朋友，有無興趣一齊睇呀？

無覺好瞓既日子，重要維持多大半個月﹗

擇日不如撞日

2006-05-17T00:38:00.000+08:00

真係擇日不如撞日，今日下晝打電話俾美人，咁啱得咁橋得得b小姐又打俾佢，原來佢剛剛放工，無喇喇講講下結果相約左去飲野，重約埋豪哥添，真係﹗特登約都鬼死咁難，約成幾個月都唔得，但無喇喇咁樣平日竟然又可以約到幾個人出黎飲野，世事真係奇妙﹗(不過其實真係幾難得，豪哥未有工番，我放假，得得b又收早)

咁樣下午飲野，確實係一件賞心樂事，舒適寫意﹗老朋友聚頭，細說從前，互訴近況，暢談將來，開心開心﹗期待下次活動﹗

放心喇美人，包係我身上﹗

名人單車賽

2006-05-15T00:05:00.000+08:00

籌備多時既名人單車實終於係今個星期六完滿結束，參加既名人眾多，有白韻琴、葉子媚、盧海鵬、簡炳墀同我本人，我地三點半係大圍搵左一間單車行租車，$40其實都幾平，揀完車之後，因為白姐姐同盧海都係唔太識踩既，所以要係空地度練習一陣，不過其實佢地已經比我想像中好，練左一陣就得，於是我地浩浩蕩蕩咁由大圍出發，目的地係大埔。

開始既時候好快就由簡炳墀同盧海放出，葉子媚中間，白姐姐殿後，佢係後面怒撞花叢，狂堪鐵欄，險象橫生，搞到遍體鱗傷，右腳報銷，戰況慘烈。不過佢都越踩越好，之後都無乜點抄。去到中段，我地去到吐露港公路傍既石灘，係日落之下放低單車玩左陣，藍天白雲，景色一流，令人心曠神怡﹗抖左一陣之後，我地繼續旅程，大家都回復體力，結果係預期中既交車時間七點去到大埔交車，我覺得非常好﹗

辛勞一日，當然要食番d好野補番下，簡sir因有事先走，我地就去左食「滿江紅」，雖然人好多，好彩好快就有位。叫到成枱都係野，認真豐富﹗食完之後重去左白姐姐介紹既糖水店食糖水，起初以為係佢自己虛構出黎，最後幾經辛苦都俾我地搵到佢，都ok好食既，不過一d不知名、一粒粒既野就.........令人毛管棟﹗

特別鳴謝：葉子媚借出的三眼人朋友

子媚的作品~

BBQ@西貢海灣

2006-05-01T17:55:00.000+08:00

一連三日既勞動節假期，梗係要搵D野搞下喇，唔係都對唔住自己呀﹗E個假期既重點節目就係BBQ，人物有 mei mei、tracy、fion、jo、terence 同我，我地一行六人去左西貢海灣既 king of BBQ，果度俾我既第一個感覺係幾乾淨，佢並唔係傳統用燒烤叉「吉」住黎燒果種，而係放係個網上面煎，有好有唔好喇，其實幾熱（因為幾近個爐）同埋Ｄ野食好鬼快燒焦，不過野食都算多款，同埋多個Ｄ時間一齊玩下其他野，例如「家有喜事問答比賽」（佢地癲嫁﹗）、鋤下Ｄｅｅ、玩下魔術、估下ＩＱ題等等，總之不停玩，哈哈，唔覺唔覺咁就幾個鐘﹗不過戲肉重未到．．．

Part 2 就係mei mei提議既大膽遊戲，要係燒烤場出面既沙灘度進行，兩個人、三個人不停既無敵風火輪，重要係食飽野之後玩，確實大膽，轉到成身都係沙﹗（最開心都係見到人地插沙）之後我地又玩勁多既集體遊戲，紅綠燈、「何仔公」、解手、呯啪嘩，重有水上飄添﹗玩到成身汗同
沙，好耐都無試過玩到咁，好有邊緣青年ｆｅｅｌ ﹗

玩到三點幾，大家都盡慶而歸，乾杯﹗
下次再玩過喇﹗

meimei的傑作

復活﹗

2006-04-22T02:16:00.000+08:00

悠長既復活節假期過去，都好似無咩做過咁，唱左次k，燒左次野食，踢左幾次波咁，不過最開心係同豪哥佢地踢波，事關無同佢踢起碼年幾喇，真係好難得，難得在好似回到以前中學踢波既日子，以後踢多d喇﹗

今次假期有個遺憾，就係放左美人佢地飛機，我知道我超唔啱，我都覺得非常內疚，我應承你地下一次既活由我黎搞，放心喇大家，件事已經完滿結束喇，我唔會再係度糾纏落去，今次我真係決定左，已經頹廢左年幾，唔可以再浪費時間，我要復活﹗我要轉工﹗我要搵$$$﹗

ps : 對不起 x 100 to lps friends

清明澳門遊

2006-04-10T22:51:00.001+08:00

今年清明節，因有平價的酒店連船飛套票，所以同朋友去左澳門玩。

已經有幾年無踏足過澳門，上一次係year1既時候同同學一齊去，不過話時話，之前去過幾次澳門都無去過當地既名勝，認真無隱，所以今次我出發前已經定下一定要遊覽最少一個名勝既目標，結果不負所望，我去左大三巴，超多國內同胞.......

朋友的當地朋友介紹我地到一間地道既大排檔品嚐真正澳門既風味，果然幾好食，尤其炸菱魚球，水蟹粥亦非常值得一試。之後我地又去左氹仔既大利食馳名既豬扒包，同香港既簡直無得比。

賭場當然係我地必到既地方，金莎同英皇兩個賭場都好新淨，不過金莎就多人好多，英皇就無乜人，可能因為果晚係清明前一晚喇，無乜人賭錢。金莎就非常有賭場既氣氛，我亦受到感染，少少地玩下，結果當然係敗走金莎~

三月途亡潮

2006-04-10T22:25:00.000+08:00

呢個三月，對我地公司黎講，絕對係一個黑暗既月份，同事一個接一個離我地而去，tracy媽媽、michael、陳顯豐、jack。見證住佢地既離開，大家都好唔捨得，原本鬧哄哄既公司，一下子靜左落黎，嘈吵既豬欄變得不再嘈吵，不過相信很快大家都會適應。雖然佢地係新公司好辛苦，不過希望佢地會有好好既前景，我地都會努力嫁喇﹗

Justin ONE GOOD SHOW

2006-04-06T23:23:00.000+08:00

成個月無寫過，而家可以總結番上個月既野。

3月26日睇左側田處男演唱會，雖然無咩華裝麗服，又無咩勁歌熱舞(不過都預左)，出奇地覺得非常好睇，氣氛都算幾好，唱歌固然係佢既強項，無論自己歌定人地歌都係咁好聽。不過佢講野真係好唔得，佢一個人真係壓唔到台，完全被古巨基同楊千嬅一出黎就蓋過。

不過唔緊要丫，我都依然覺得係
ONE GOOD SHOW﹗

希望越大、失望越大

2006-03-08T23:28:00.000+08:00

可能我真係太着緊，抱有太大既期望，從今開始不再希望.......

朋友　我當你一秒朋友朋友　我當你一世朋友
奇怪　過去再不堪回首懷緬　時時其實還有
朋友　你試過將我營救朋友　你試過把我批鬥
無法　再與你交心聯手畢竟　難得　有過最佳損友

從前共你　促膝把酒　傾通宵都不夠我有痛快過　你有沒有
很多東西今生只可給你　保守至到永久別人如何明白透
實實在在　踏入過我宇宙即使相處到　有個裂口命
運決定了　以後再沒法聚頭但說過去　卻那樣厚

問我有沒有　確實也沒有　一直躲避的藉口　非甚麼大仇　
為何舊知己　在最後　變不到老友　不知你是我敵友　
已沒法望透　被推著走　跟著生活流　來年陌生的　是昨日最親的某某

生死之交當天不知罕有到你變節了　至覺未夠
多想一天　彼此都不追究　相邀再次喝酒待葡萄成熟透
但是命運入面　每個邂逅一起走到了　某個路口
是敵與是友　各自也沒有自由位置變了　各有隊友

私房菜@中環

2006-03-05T23:34:00.000+08:00

琴日巧儀佢地幫我慶祝生日，我都係第一次去食私房菜，環境的確幾舒服，好有住家既感覺，唔會有出面餐廳既嘈吵，真正適合三五知己食飯傾偈既地方。

佢地一早已經order好餸菜，一去到就即刻有得食，成張紙咁長，真係睇到眼都突。可能因為一開始食果一兩樣比較辣，味覺已經被辣壞左，之後食既野都好似辣咁既。食下食下，原來我地都幾食得，都無乜得淨。佢地重送左件tee俾我，非常啱身，夏天又多件衫着，多謝晒﹗

之後我地轉戰去左銅鑼灣飲野傾偈，講開工作，我發現自己未有清晰既方向，如果無方向，根本唔知應該係邊度努力，無從入手，今年一定要搵到自己既路﹗

最寒冷/溫暖既三月一日

2006-03-04T02:18:00.000+08:00

話咁快又廿五歲，如果好命有一百歲既話，我既人生已經過左四份之一，突然感覺到好似白費左25年時間咁，所以我要把握時間，今年我既生日願望係為我既事業而努力、憤鬥，賺$$$$$。不過，其實我呢25年都唔係白費既，最少我識到好多好朋友，呢幾日多謝佢地同我慶祝。

一班樹仁既同學28/2晚上同我唱k慶祝，佢地重為我預備左一個車既蛋糕，我都好希望今年可以儲到$$買車﹗

1/3/2006，我相信係我懂事以來最寒冷既生日，氣溫徘徊10度左右，同事們本身預定為我燒野食慶祝，都擔心會唔會太凍，結果佢地真夠義氣，唔怕寒風凜冽，照原定計劃燒野食，我地去左之前未去過既大欖度燒，多得花姐介紹，先可以試到佢既野食真係好過小欖，尤其係叉燒粒，真係好鬼正，加上佢唔係海邊，咁就無咁凍。佢地重買左個足球既蛋糕，好特別。

最後，真的多謝各路好友既心意，令我有一個最寒冷/溫暖既生日﹗

奧比斯「步步獻光明」2006

2006-03-04T01:10:00.000+08:00

上星期日我地一大班同事參加咗奧比斯「步步獻光明」步行籌款，雖然果$250善款都係我自己出既，不過無計喇，做善事嘛，又可以行山。我地一大清早係中環碼頭集合(重早過平時番工)，乘坐大會預備既巴士去到香港國際學校，去到即刻見到身穿整齊st. John制服既阿馮，完全唔似平日既佢，可惜不能同佢合照。

經過由2R主持既開幕儀式及熱身運動後，活動正式開始，今次參加既人數眾多，初初起步既時候人頭湧湧，遍佈整條馬路，有的35知己、有的2人同行、有的一家大細、有的更帶埋寵物支持。由於我地都是年青人，當然挑戰最艱辛既13公里路線，人數漸漸減少，難度亦開始增加，但這樣才令人有行山既感覺，上山的一段是行程中最辛苦，上到山上，眼前豁然開朗，風景明美，加上涼風撲面而來，舒服非常﹗

及後轉入康莊易行既石屎路段，行程亦接近尾聲，我地大約用左2個鐘頭完成左13公里既路程，行下抖下，差唔多喇。完成後我地係學校草地享用大會提供既三文治餐，都幾飽下。好耐都無行山喇，感覺好舒服﹗

*被一個好朋友放飛機，真的感到很失望

深圳一日遊

2006-02-25T00:58:00.000+08:00

已經有三四年無返過大陸既我，之前終於dick起心肝申請番過左期既回鄉卡，因為聽同事成日北上作樂，好似好多野玩咁，而且好平，搞到我都好想去走一轉。結果係兩個星期前，我地浩浩蕩蕩一行十數人出發北上深圳，決定吃喝玩樂一番。我地放左工一齊係上水出發，經羅湖過關，再搭深圳既地鐵，真係估唔到當地既地鐵咁靚，個站同香港站好相似，而張地鐵飛就最特別，係一個籌碼咁既野黎。
我地主要既行程其實都係去書城度買同睇書，書城真係好大，有成5層，好多人都坐係地下睇書，成個圖書館咁，不過d書既品質就真係麻麻喇，可能因為俾d人睇得多。一睇我地就睇左成三四個鐘，佢地就真係大豐收，買書都買左成800蚊，簡直係瘋狂。
之後我地去左食小肥羊，準備大「刷」一餐，試下係咪真係咁平，結果我地叫到成間房都係野食，食到個個都反晒艇，都係食左每人60幾蚊，真係抵到爛，係香港無百幾二百蚊都唔駛諗呀。下次一定要試下其他平野﹗

#可惜Tracy媽媽去唔到，下次喇﹗

送雞迎狗賀新歲﹗

2006-01-30T00:47:00.000+08:00

狗年來了，先來幾句祝賀既說話，身體健康、心想事成，最緊要都係搵多d喇﹗

琴晚依舊都有去維園同人迫一迫，感受下新年既氣氛，維園依舊都係咁多人，今年市道好轉，人多左，而價錢亦都高左，我想買平花既大計失敗左，到三點幾個價都重企到硬一硬，結果用左成舊水，不過好彩都幾靚。

晚上去左拎燒豬上阿婆度拜年，利是當然係唔少得喇，重同細佬表妹佢地打麻雀，呢次都係第一次同佢地一齊打麻雀，雖然唔係打得大，但係我有一種大家都長大成人既感覺。飲左d啤酒，帶點醉意~

保"ling"、保"ling"......

2006-01-18T00:08:00.000+08:00

突然收到阿 joy既來電，原來今日佢係屯門做野，於是相約左一齊食lunch，講到大家既工作，都覺得唔係太滿意，更加感到自己當初既短視，好似白白浪費左4年既時間咁，結果我地毅然做左個決定 - 社會福利界，再見喇﹗

放工後，一大班同事相約左去仁愛堂碌齡，係果度打羽毛球就打得多，碌齡就第一次，果度都有成廿幾條ling，不過 ling多、人更多，去到都要等左成半個鐘先有位，無法喇，咁抵﹗難得 tracy媽媽咁踴躍出席我地既球類活動，原來佢好得嫁，野野九件，唔係全中就補中，閑閑地都過百分呀，好犀利﹗而 suky就姿勢分得最高既10分，無論佢點打都會擺出個優美既姿態，實在當之無愧。不過唯一唔好既就係得一條ling 俾我地打，8個人輪一條，等都有排等。

碌完齡之後我地去左大排檔食野，今次係第二次黎呢度，於是試下食另外一間，點知「奶」野，d送又慢又細碟，真係食到又攰又眼訓，強烈建議下次唔再去呢一間。

運動週

2006-01-14T16:24:00.000+08:00

今個星期狂做運動，MON做 gym，TUE打籃球，WED打羽毛球，THU做 gym，FRI踢波，每日番工都攰「奶奶」，每個星期都keep住玩，真係人都癲，無辦法喇，阿詩又要地獄式既訓練，唯有繼續同佢博命喇。本身淨係打下羽毛球同籃球，係偶然既機會下認識左班的士佬波牛，令我地每個禮拜多埋踢波呢樣活動，下個星期重有草場踢添，真係好期待﹗

入左黎社署一年，不停係度食食食，體重已經增加超過10磅，不過我都覺得ok喎，因為自己一直都想增磅，而家可以有d肉，跟住就可以練大隻d嘞 (咁又唔駛練到好似城城咁勁)，總之要 keep住運動、運動、運動﹗

Twins一時無兩演唱會

2006-01-07T02:46:00.000+08:00

身為Twins既忠實fans，佢地一次演唱會都未睇過，本人實有少許慚愧，今年終於得嘗所願喇，得到kasumi既幫助，幫我抽到$200蚊既飛，雖然唔係話好近，不過唔駛$$，你想點丫。遲左半個鐘先開show，大致上同報紙雜誌講既差唔多，但估唔到iloveuboyz咁搞笑，估唔到九唔搭八gigi做嘉賓，估唔到阿嬌同阿sa既solo都幾好睇，更估唔到原來Twins有好多歌我都唔識......原來唔經唔覺佢地已經出道左5年，如果佢地唔拆既話，我決定下年會買$400。

特別嗚謝：kasumi

冬日購物節

2006-01-02T23:50:00.000+08:00

一連三日既工作咁又做完喇，企到隻腳超攰，把聲嗌到「擦」晒，覺得有d做年宵feel咁，d香港人真係好鬼鍾意迫，真係迫到行都好艱難，不過我又唔抗拒呢種情況，因為夠熱鬧嘛﹗不停咁搖旗吶喊，無論自己攤位既同事，到其他攤位既朋友；由第一日無乜兩句，到最尾果日幫埋人地拉客，感覺好好。寓工作於娛樂，一面做野，一面又可以同左右隔離吹下水，又可以賺到$$，呢d兼職希望長做長有喇。多謝阿福~

阿詩Happy Birthday!

2005-12-27T12:42:00.000+08:00

今日係阿詩既生日，佢琴晚就搞左個party，慶祝埋boxing day，之前都幾驚佢搵唔夠人，出乎意料之外有突添(好彩阿jack帶左幾個fd黎)。cafe地方真係幾大，不過我無乜食野，淨係掛住玩分組遊戲，好難食呀d絲襪~~~d遊戲都幾好玩，個個組員都玩得好投入(我要扮木乃伊)，全靠司儀搞到氣氛。認識左好多新朋友，真係好開心﹗

p.s. happy birthday to sze !

誕生日﹗

2005-12-27T12:05:00.000+08:00

今日係我日記既誕生日，新一年又就黎喇，每年都會有唔同既事發生，就由今日開始寫低我遇過既人和事，好讓日後回味。